Hansı mövzularda yazım?

Saytda qeydiyyatdan keçdikdən sonra özünüzə fəaliyyət istiqaməti müəyyən edin. Düşünün, “mən nə yazım?”, və ya “hansı yazılarımı paylaşım?”. Ola bilsin ki, siz indiyədək yalnız hekayə janrında yazmısınız və ya ancaq şeirləriniz var. Fəaliyyətinizə həmin yazılarınızı paylaşmaqla başlaya bilərsiniz. Lakin bir məqamı da nəzərə alın: Yazar.in-də təkcə bədii yox, həm də elmi, publisistik, informativ yazılar da yerləşdirilir və bu yazıların da müəyyən oxucu auditoriyası var. Siz fəaliyyətiniz ərzində hekayələrinizlə və ya yaradıcılığınıza xas digər yazılarla yanaşı, arabir elmi, informativ, publisistik yazılar da yazıb paylaşmaqla həmin auditoriyanın diqqətini özünüzə yönəldə bilərsiniz. Beləliklə, elmi yazılar oxumaq üçün sayta daxil olmuş istifadəçi sizin elmi yazınızı gördükdən sonra profilinizə daxil olub digər yazılarınızı da görəcək və bu, sizin ənənəvi üslubunuza xas yazılarınız üçün yeni auditoriyanın formalaşmasına kömək olacaq. Nəzərə alın ki, Yazar.in-də mövzu məhdudiyyəti yoxdur. Təki yazdıqlarınız maraqlı olsun.