20 YANVAR ŞƏHİDLƏRİ

Qarlı-zülmət bir gecədə nur saçdılar,

Yağılarla ərən kimi savaşdılar.

Azadlığa gedən yoldan söz açdılar –

20 Yanvar şəhidləri!

Paytaxt Bakı dönəndə qan dənizinə,

Bələd olduq imperiyanın iç üzünə.

Çevrildilər bəxtimizin gündüzünə -

20 Yanvar şəhidləri!

Nalə qalxdı asimana, üzüldü can,

Hər tərəfə yağış kimi çiləndi qan.

Ulu xalqın yaddaşında təzə ünvan –

20 Yanvar şəhidləri!

Namərd düşmən düşsə də qara niyyətə,

Məğlub oldu el gücünə, əzəmətə.

Alnı açıq üz tutdu əbədiyyətə -

20 Yanvar şəhidləri!

Biz bu dərdi daşısaq da aya-ilə,

Matəm rəngi ta yaraşmır qərənfilə.

Nəğmə kimi düşübdülər dildən-dilə -

20 Yanvar şəhidləri!

MÜƏLLİF:SEYMUR SÖNMƏZ PAŞAYEV