Vuruldum sənə bayram gecəsi,

Gördüm ki, gözlərin işıqla dolu...

Ürəyin incəsi, sözün incəsi

Gördüm ki, səndədi, a dağlar oğlu!

O gündən çox keçib, gözləmir zaman.

Bu illər ərzində qocaldıq yaman.

Son vaxtlar nədəndi  arada duman,

Saf  hisslər çəndədi,  a dağlar oğlu?

Gəl qovaq aradan getsin duman-çən,

Vurulaq təzədən, sevək təzədən.

Nə səhvimiz varsa, düzəkdək, nə qəm,

İxtiyar kimdədi, a dağlar oğlu?

Olan gözəlliyim solubdu bəlkə?

Qəlbin qarla-buzla dolubdu bəlkə?

Seviləm, ağlaram qəm çəkə-çəkə,

Səadət gendədi, a dağlar oğlu...