***

yazdığım sətirlər səpələnib çılpaq bədənimə,

geyinirəm hərfləri,

bürünürəm cümlələrə.

dilimdən çıxan hər sözü

 süzürəm badələrə.

içirəm  sənin adını,

sərxoşluqda hiss edirəm sənin dadını.

bir azca acı kimisən,

ruhumun ehtiyacı kimisən.

              ***

payız günəşinin rəngi sərindir, 
bulud hərdən toxunur örtür gözünü.
külək gəlir ona qonaq,
yağışla darayır göy üzünü.
və,
Tanrı səmada qoyur əl izini.

                 ***

bütün içkilərin içində qadın var,
o qadında dinlədiyin mahnıların var.  

                ***

əvvəl səninlə oturub şərab içirdim,

sərxoş olurdum.

indi yoxsan,

şərabla oturub səni içirəm,

şair oluram.