Bu dünyadan aman umdum yüz kərə,

Dərdlərimi calaq etdi dərdlərə.

Namərd gördüm öyüd verir mərdlərə,

O mərdlərin amalına ağladım!

Ömür gördüm baharında qırılmış,

Ürək gördüm ah çəkməkdən yorulmuş,

Yuva gördüm min haramdan qurulmuş,

O yuvanın halalına ağladım!

Kimlər getdi bu zamanın köçündə,

Ömür solur, fələk yenə biçində,

Oyaq gördüm yatmışların içində,

O oyağın xəyalına ağladım!

Şəhid atasını gözləri gəzən,

Kövrəlib gizlicə dodağın büzən,

Yaşlı gözlərimi mənalı süzən

Bir körpənin sualına ağladım!

14.05.1991