Öncədən yazılıb kimsən, nəçisən,
Ya zəngin bir tüccar, ya çəkməçisən,
Dadacaqsan ölümü tezi, geci sən,
Alın yazısını dəyişmək olmur

Səhərin günəşi, gecənin ayı,
Bilinmir göylərdə ulduzun sayı,
Qışa tab etməsən görməzsən yayı,
Alın yazısını dəyişmək olmur

Dünəni, bu günü, sabahı unut,
İki rükət namaz qıl, səsləndir qunut,
Allah Quran ilə gətirib sübut,
Alın yazısını dəyişmək olmur

Bu dünya malına, gəl salma meyil,
Bir tək üzü qibləyə səcdəylə əyil,
Kəfənin ciblisi tikilən deyil,
Alın yazısını dəyişmək olmur

Hər bir kəs yolunu vuracaq başa,
Sənin də qılıncın dəyəcək daşa,
Sabahı düşünmə, bu günlə yaşa,
Alın yazısını dəyişmək olmur.

09.08.2017

Müəllif: Tural Rəhmanlı