Anlat mənə dinlədiyin mahnını, duyduğun notları, kim duyur səndən başqa onları?

Anlat mənə insan kimi dünyaya gəlməyi hər xırda şeyə gülməyi, sevinməyi.

Anlat mənə ana qucağını, ata nə vazişini,səninlə sevinən kimsələri.

Anlat mənə uşaqlığını ən böyük qorxun olan qarışıq yuxularını.

Anlat dərslərini, həvəslərini, ilk məhəbbətini,

dərd saydığın qayğıları, təmiz dünyanı, hamını özün kimi saymağı

Anlat mənə həyatı, arzularını, onlarla qurduğun xəyalları

Anlat mənə məktəb illərini, müəllim töhmətini, yeganə qayğın olan imtahan qiymətini

Anlat mənə gördüyün ilk haqsızlığı, sevmədiyin insanları

Anlat mənə tanımağa başladığın cəmiyyəti, qırılan ümüdləri

Anlat mənə böyüməyi, gəncliyi, dərs aldığın səhvləri

Anlat mənə ailəni, o xoşbəxtliyi, övladının ilk ata deməyini, ana səsləməyini, sənin ona məhəbbətini

 Eşitmək istəyirəm, anlat mənə o həyatı, bəlkə gözlərimdə canlandı

Dadmaq istəyirəm o duyğuları, anlamaq istəyirəm mənasını

Anlat mənə qız köçürməyi, oğul evləndirməyi, anlat mənə sevdiyinlə bir ömür keçirməyi, hər çətin günüzdə, biraz da artan sevginizi

Anlat mənə qocalığı, nəvə ləzzətini, ahıl yaşın gözəlliyini, öpülən əllərini, sənə edilən hörməti

Anlat mənə son nəfəsini, o an hiss etdiklərini, qızlarının sənin üçün göz yaşı tökməyini

Anlat mənə buraya gəlməyini, səni danışdıran mələkləri, yazılan günahları, savab işlərini

Anlat mənə yaşamağı, həyatı bir ömürdən geri qalanları

Sən anlat mənə dünyanı, mən sənə burdakıları

Sən anlat faniliyi, həyat sevincini, cənnəti, dörd ilin bir gecə olan cəhənnəmi

Axı mən nakamam dünyadan

Anlat mənə dünyanı, günəşin doğmağını, sübh azanını

Bunları dünyada dinləməyi, kəvakibi oradan izləməyi

Qurban ver göz yaşlarıma keçən zamanı, anlat mənə dünyada olmağı, ölmək üçün doğulmağı

Həsrətlə dinləyirəm, anlat mənə bunları...