Bu yol ayrıcında de çoxmu duraq,
Alovun, istisin itirmiş çıraq.
Get, "Minbir gecə"dən oxunmuş varaq,
Get, sənə yaxşı yol, bir də qayıtma.

Gəldin gözlənilməz bir ahəng kimi,
Gəldin zər qanadlı kəpənək kimi,.
Oldun sən əzilmiş bir çələng kimi
Get, sənə yaxşı yol, bir də qayıtma.

Sən öz muradına çatıb gedirsən,
Gedirsən, günaha batıb gedirsən,
İndi ki sən məni atıb gedirsən,
Get, sənə yaxşı yol, bir də qayıtma.

Anladım sən qədir bilən deyilsən,
Mənim dərdlərimi bölən deyilsən,
Məzarım üstünə gələn deyilsən,
Get, sənə yaxşı yol, bir də qayıtma.

Sən bu gəlişinlə de nə qazandın?
Bəs gedişinlə nə qazanacaqsan?
Üç illik ömürü bir gündə qandın,
Nə qədər aldadıb-aldanacaqsan?
Get, sənə yaxşı yol, bir də qayıtma.