Yenə bir an gələr, qarşılaşarıq, 
Yenə də göz-gözə gələrək, əlbət, 
Bu qəfil görüşdən çaşıb-qalarıq:
- Sən üzdə xəcalət, 
mən üzdə nifrət, 
Sən qəlbdə həyacan, 
mənsə məhəbbət.

Yenə tüğyan edər zaman dənizi,
Qəlb haray çəksə də, nitqimiz susar,
Dalğalar qoynuna alaraq bizi,
O keçən anlara alıb-aparar.

Dayanıb üz-üzə sakit, səmirsiz, 
Beyində xəyallar, gözdə suallar,
Üzünü məndən yan tutarsan səssiz,
Çünki gözlərimdən gözün utanar.

Baxıb gözlərimə bir də həmin an,
Mərhəmət dilənmə dilənçilərtək.
Yada sal, yada sal mən də bir zaman,
Sevgi istəmişdim dilənçilərtək.

Sən mənli anları unutdun, bəlkə,
Mən sənli anlarda azıb-qalmışam.
Sən yeni gələcək qazandın, bəlkə,
Mən hələ gələcək qazanmamışam.