Bizə qəm yaraşır, bax budur işin

Yüz dəfə sevinci soyub geyinmə

Bir dəfə üzünə tüpür keçmişin,

Yüz dəfə ardınca söyüb deyinmə

Dərdinə əbədi sadiqsən deyə

Səni çox yıxacaq, sürüyəcəklər,

Necə ki sarınır kəfən ölüyə,

Heçliyi mənaya bürüyəcəklər

Milyardlar özünə unutduracaq,

Kütləyə başqa cür gəlir bu boşluq

Fərqi can atılan son dayanacaq,

Onlar keyf axtarır, sən sərxoşluq

Onlar hər şəninə tərif deyəndə

Sən qəm şərabından qurtum alırsan,

Onlar əyləncənin hərisliyində,

Sən isə özündən qurtulmalısan

Bizə qəm yaraşır, sevinc haramdır,

Bizdə ilk bahar da son bahar kimi

Yalnızca sevgiyə gümanım vardı,

O da çox gecikdi intihar kimi