"Bu gecikmiş sevgi üçün..."

Ömrün ahıl bir çağında,
Fikrim sevgi bağçasında.
Gəzir eşqin sorağında
Bu gecikmiş sevgi üçün.
***
Mən sevmədim bu günədək,
Tale üzə gülənədək.
Gözləyəcəm ölənədək
Bu gecikmiş sevgi üçün.
***
İllər ötür,ömür yarı,
Necə gəldim bu yolları?
Hey gedirəm ona sarı-
Bu gecikmiş sevgi üçün.
***
Mən hələ də bezməmişəm,
Yalnız onu gözləmişəm.
Ümidimi üzməmişəm,
Bu gecikmiş sevgi üçün.
***
Sən gec gəldin bu dünyaya,
Mən tələsdim bu sevdaya.
Nədən döndük günə,aya
Bu gecikmiş sevgi üçün.
***
Mövlud,nədir,de,istəyin,
İnciməyin,tez küsməyin?
Yeri deyil tələsməyin 
Bu gecikmiş sevgi üçün.

9.06.2014.Zərdabi.Mövlud Ağamməd.