Çox sevsəm də, yağış səni,
Durub - durub yağma, bəsdi.
Bulud, sən də çəkil daha,
qaşqabağı yığma, bəsdi. 

Pəncərəmdə gilə - gilə
iz qoyursan naxışları.
Üşüdürsən, soyudursan
İsti baxan baxışları. 

Mən sevdiyim sevməyirsə,
Yağış necə sevim səni?
Yağırsan yağ, dözəcəyəm,
Gətirmə o duman - çəni. 

Dedim, gülüm xatirimə
Sevərsənmi sən yağışı?
Dedi, sənin xatirinə
Sevərəm lap boran - qışı