Demə sevgidədir....

Demə sevgidədir gücün,qüdrətin,
Məhəbbət arxadır sənin ömrünə.
Həyatda şan-şöhrət nədir,bilmədin,
Bunları bilirəm sən deməsən də.
****
İlk dəfə sevdiyin o gözəl dilbər,
İnandı səndəki əhdə,ilqara.
Gözlədi yolunu,səndən yox xəbər,
Onu tərk elədin,de,getdin hara?
***
Eşqə xəyanətə cəza böyükdür,
Sevgi məhkəməsi qurulsa əgər.
İndi ürəyinin odu sönükdür,
Yandıra bilməzsən,çalışsan əgər.
****
Çalış,bircə dəfə sev saf ürəklə,
Qəlbində xəyanət yuva salmasın.
Ömrünü şən keçir arzu,diləklə,
Kədər heç vaxt sənə nəsib olmasın.

28.04.1982.Sumqayıt.Mövlud Ağamməd