Başının üstünü duman almasın,

Kövrəlcək gözlərin yaşla dolmasın.

Əlin titrəməsin, rəngin solmasın,

Zənn etmə “şəkərli, yağlıdı” dünya!

Qarı-şaxtası da, yağışı da var,

Ürəyi sızladan “baxışı” da var.

Uçrumu, enişi, yoxuşu da var,

Əzəldən aranlı-dağlıdı dünya!

Göydə ulduzları gur işıq saçmaz,

Büdrəyib yıxılsan yanına qaçmaz.

Heç kimə inanıb sirrini açmaz,

Bəxt kimi qaralı-ağlıdı dünya!

Çoxuna ürəkdən diləməz uğur,

Nə duyan qəlbi var, nə “cismində” nur.

Sən onun “dilinə” aldanma, Seymur,

Gördünmü, üzünə bağlıdı dünya!

MÜƏLLİF:SEYMUR SÖNMƏZ