Qoşma

Dünya,özün boyda dərdin var sənin,
Yetənə yetirsən,daş da atırsan.
Hər nəyi istəsən,onu edirsən,
Hələ bir üstəlik baş da qatırsan.
***
Sevənlər Məcnuntək səhralardadır,
Sevilən kəslərin könlü qübardır.
Tökülən dolacaq,mey ayaqdadır,1
Süzülür gözlərin,qaş da çatırsan.
***
Yalan ayaq tutar,ancaq yeriməz,
Quzeylərin qarı,buzu əriməz.
Tarixin bilinməz,yaşın bilinməz,
Yaşının üstünə yaş da atırsan.
***
Qocalıq çatdımı,ölüm haqlayır,
Mövludun ürəyi qübar bağlayır.
Səni yaradanmı cavan saxlayır?
Sel kimi çağlayıb daş da,batırsan?

1Ayaq(arxaizm-Badə deməkdir..

4.05.2013.Zərdabi.(Mövlud Ağamməd)