Bəs deyirdin yoxam artıq,
ölüyəm mən 

Yenidənmi doğulmusan
qaraltdığın dünyama sən?!
Bəs deyirdin gedəcəyəm,
İzim tozum qalmayacaq.
Könlüm sevgi axtaracaq,
Səni yada salmayacaq.
Deyirdin ki, yeni dostlar qazanaraq
xoşbəxt həyat sütəcəyəm.
Deyirdin ki, hər qarşıma çıxdığında
rişxənd edib güləcəyəm.
Gözlərim də qaçacaqdır
cəsarətsiz gözlərindən.
Qulaqlarım duymayacaq
ah-fəğanı sözlərindən.
Söyləyirdin silinəcək
siman mənim xəyalımdan.
Bəs deyirdin çıxartdım mən
səni tamam həyatımdan.
Yoxdum artıq yer üzündə!
Yoxdum artıq sənin üçün!
İndi özün söylə görək,
Qayıtmısan yaddaşımda
xatirəmi qoymaq üçün?!
Hanı o sərt, o qərarlı,
Tüğyan edən nifrət hissin?
Yoxsa ölən məhəbbətin
cana gəlib aldı yerin?...
Niyə döndün?
Hey axtardın cəsarətsiz məhəbbəti?!
Səni qane etmədimi
dostlarının sədaqəti?!.
İndi yadsan mənə artıq,
Tanımıram mən səni heç!
Getmisənsə həyatımdan,
Birdəfəlik, əbədi get!..

Müəllif ƏSMƏR QASIMLİ