Bir ulu sevgi var, Tanrı sevgisi,

Bir də Tanrımızın Özünə sevgi.

Ötəri - keçəri sevgi bir başqa,

 Bir də var həqiqi, düzünə sevgi.

Tanrıya sevgimin hüdudu sonsuz,

Sübuta, təstiqə bir ehtiyac yox.

Ömrümüz çox qısa, sirli bir nağıl,

Onsuz müşküllərə heç bir əlac yox.

İstəsə güldürər, istər ağladar,

Bizlərə can verən, alan Odur, O.

Bizik bu dünyaya gəldi - gedərlər,

Əbədi var olan, qalan Odur, O.

Nə yerin, nə göyün hökmü deyildir,

Bəşərin günahı öz içindədir.

Ürəyin istisi məhəbbətində,

Ocağın istisi köz içindədir.