Bir zaman keçməzdi su da aradan,
Axı niyə olduq "yad ellər" kimi?
Mən də sənin üçün oldum sıradan,
Nə yaman dəyişdin fəsillər kimi.

Əvvəlcə bənzətdim "bahara" səni,
Aldım xoş ətrini güldən-çiçəkdən,
Yanağın bəmbəyaz, özün bəmbəyaz,
Səni ayırmırdım vallah, mələkdən...

Sonra da çevrilib isti "yay" oldun,
Qızındım bu eşqin hərarətində.
Üzümə təbəssüm bəxş edəndə sən,
Dedim: "Necə çıxım xəcalətindən...?"

Döndün saralaraq qızıl "payıza"
Gördüm ki bu eşqim gedəcək hədər.
Ürəyi vermədim mən heç bir qıza,
Sənə verdiyimin yarısı qədər...

Nəhayət, dönərək boranlı "qışa"
Ömrümə çovğunu sən qonaq etdin.
Yaxşı rol oynadın, görüm min yaşa!
Bütün həyatımı dondurub getdin...!

Müəllif Hüquqları qorunur...
Müəllif İlkin Abbas