Saldı qara çadrasını yenə başına,
Aləmi bürüdü zülmətə gecə,
Deyirlər şəfadır xəstə qəlblərə,
Yaxşı çarə qılır səhhətə gecə.

Eşqdən küsənlərin dərd ortağısan,
Səni həmdəm bilir asi bəndələr,
Günün ən gizli, ən sirli çağısan,
Layiqsən xoş sözə rəğbətə gecə.

Qır bu zəncirləri, yasaqları qır!
Təsəlli tapsınlar səni umanlar,
Aşiqlər içində öz yerin vardır,
Bax sənə olan hörmətə gecə!