Bildinmi, istəyim gözümdə qaldı,

Qəfildən üstümü duman-çən aldı.

Ayrılıq ən ucsuz-bucaqsız yoldu -

Gedirsən, məni də özünlə apar!

De, necə başımı qatım birtəhər,

Məni əldən salar acı bir qəhər.

Gözümdə heç zaman açılmaz səhər -

Gedirsən, məni də özünlə apar!

Qulumdan tut, düşək yolun ağına,

Boylanaq axşama, səhər çağına.

Qorxma, dolaşmaram əl-ayağına -

Gedirsən, məni də özünlə apar!

Heç vədə dönmərəm könlündə yada,

Ülvi eşqimizi vermərəm bada.

Yaşaya bilmərəm sənsiz, dünyada -

Gedirsən, məni də özünlə apar!

Ay şair Seymurun könül həmdəmi,

De, niyə tez çatdı ayrılıq dəmi?

Yükləyib çiynimə dağ boyda qəmi,

Gedirsən, məni də özünlə apar!

MÜƏLLİF:
SEYMUR SÖNMƏZ PAŞAYEV