Sevgi bağı gül-çiçəkli,
Təravətli olsa yaxşı.
Sevən aşiq sevgisində
Sədaqətli olsa yaxşı.

Yansın eşqin atəşinə,
Ancaq yarın da düşünə.
Qulaq asıb qəlb səsinə
Dəyanətli olsa yaxşı.

Əhdi-peyman pozulmasa,
Yazı tərsə yazılmasa,
Xeyir şərə yozulmasa,
Əmanətli olsa yaxşı.

Mövlud,özün məhəbbətli,
Günün keçir söz-söhbətli.
Həm taleli,həm ülfətli,
Həm qismətli olsa yaxşı.

9.02.2014 / Zərdabi
Mövlud Ağamməd