Gərçi bimarsan əgər dərdini sən loğmanə sor.

Xaliqi-aləm olan Ol Sahibi-Sübhanə sor.

Çarəsizlik çarəsi gərçi ölümdür, amma ki,

Sağikən ölmək nədir? sən bu cismə, canə sor.

Cismi yandırmaq ilə sən eşqini etdin əyan

Ruh ilə yanmağı da gəl məndən, ey pərvanə, sor

Sanmadım mən ömrümə sənsiz keçən günlərimi,

Nə çəkibdir bu cisim? sənsiz keçən zamanə sor.

Eşqin öyrətdi mənə gərçək olan zindan nədir,

Məhbusi-zindanlığı mən Yusifi-Kənanə sor.

Tərk edib getdin deyə tərəddüd etmə heç zaman,

Varsa zərrə vicdanın, sual edib vicdanə sor.

Anlamaz kimsə səni, Elnur, bu aləmdə daha

Yaşamaz bir kimsə səntək istəsən dövranə sor.