Dünya, sənə lənət ki, belə anını gördüm.

Alçaqlığı əks etdirən dövranını gördüm.

Lənət oxuduq şamu-səhər şeytana, amma

Şeytanı belə mat qoyan insanını gördüm.

Həqiqətin iki üzü varmış - deyə duydum,

Doğru üzünü görmədim, yalanını gördüm.

Tülkü başa keçdi, qudurub aslana döndü.

Çaqqalara möhtac olan aslanını gördüm. 

Gərçi bu söz heyvanlara təhqir çıxacaqdır:

- İnsan donuna girmiş çox heyvanını gördüm.

İnsanlığı bayraq tutaraq göz bəzəyənin,

Nə mənliyini, nə də ki vicdanını gördüm.

Cinan, bunu dərk et, pozulub qanuni-qayda,

De, hansı işin ədalət mizanını gördüm?