Görən...

Dirəndi tənhalıq üzümə yenə

Ömür qapısını açımmı görən?!

Əzrayıl libaslı qonaq əlindən

Baş alıb dünyadan qaçımmı görən?!

Gözümə zillənən kədər deyilmi?

Hardan tapdı yenə mənim izimi,

Sənmi qarışdırdın, yoxsa talemi

Hansınız ağartdı saçımı görən?!

Bəxtim yenə seçdi qara boyanı,

Bənzətdi zülmətə düzü-dünyanı,

Hicran küləkləri, həsrət leysanı

Ovuda bilərmi acımı görən?!