O GÖZLƏR

("Gözlər" silsiləsindən olan şeirlərimdən biri)

Bəzən məğrur baxır, bəzən ümidsiz. 
Bəzən xəyallara dalır o gözlər.
O qədər vurğunam o baxışlara
Məni özlüyümdən alır o gözlər.

Elə işıldayır mavi dəniztək.
Olmasın fırtına, əsməsin külək.
Onu əzizləyir, çox sevir ürək.
Meylimi o qıza salır o gözlər.

Bəzən körpələşər, bəzən oynayar.
Ağzıyla danışmaz, həya saxlayar.
Gözləri danışar, gülər, ağlayar
Yenicə qəlbimə varır o gözlər.

O gözlər anlamaz "nə demək kələk?!"
O gözlər olmasa yaşamaz ürək.
O gözlər olmasa həyat <yox!> demək.
Kini, kidurəti yarır o gözlər.

O gözlər şairdi, yazdı, yaratdı!
O gözlər hər şeydi - sevsən həyatdı!
O qızın gözləri bir kainatdı.
Bir Rizvan, bir də ki, baxır o gözlər.

Müəllif : Rizvan Fikrətoğlu