Gəlməz əfsus gözəlim, səndəki vicdan yerinə,
Canı min bir dəfə verdim sənə ehsan yerinə,
Sevmədin heç məni qoydun belə düşman yerinə,
"Sənə təslim elədim nəfsimi iman yerinə, 
Sənin eşqindi vücudumda axır qan yerinə".

Gecələr sübhə qədər qəlbimi hey dağlamışam,
Xatirə dəftərini xeyli açıb bağlamışam, 
O qədər həsrətin ilə gecələr ağlamışam,
"Qədəmin dəydiyi torpağı yığıb saxlamışam,
Çəkirəm nuru gedən gözlərə, dərman yerinə".

Sevmişəm mən sənə sevdamı da bərk eyləmişəm,
Səni baş tacı bilib min dəfə ərk eyləmişəm,
Sənə aiddi ürək, mən bunu dərk eyləmişəm,
"Mən sənin eşqinə adəmliyi tərk eyləmişəm,
Nola bir kimsə məni qoymasa insan yerinə?"

Məcnun çəkib gözünə səhrada Leyla şəklin,
Hansı rəssam çəkəcək qəlbimə sevda şəklin,
Qəlbimin gülü solub, alıbdı səhra şəklin,
"İstəsən çəkmək əgər rəsmə bu dünya şəklin,
Çək mənim gözlərimin əksini ümman yerinə".

Getmisən, qəlbimi mən həsrət ilə közləyirəm,
Hara qoydunsa qədəm, kölgən olub izləyirəm
Barı xəyalıma gəl, getmə ki sənsizləyirəm,
"Yazmışam kipriyinə namə, cavab gözləyirəm,
Bağrımın başını qeyd etmişəm ünvan yerinə".

Qəlbimi tərk eləyibdir mələk adlı sakin,
Ürəyim dad eləyir bax yenə qəmgin-qəmgin,
Qəlbə hakim kəsilibdir gözəlim, ol sevgin,
"Çək qılınc qaşları, çatdır sona eşqin həccin,
Sənə qurbandı bu can, kəs məni qurban yerinə".

İlkinin gözlərini özgəsi silməz, Arif,
Cəfayi çəkməyən eşq qədrini bilməz, Arif,
Gözüm ağlar qalacaq, bir daha gülməz, Arif,
"Nalə-fəryad ilə yar insafa gəlməz, Arif,
Dilkeş üstündə elə, zümzümə, əfqan yerinə".