Bu gecə bir hicran döydü qapımı,

O kədər dostuyla qonaq gəlmişdi.

Payıza bürüyüb tər çiçəyimi

Bir qucaq göz yaşı payla gəlmişdi.

Pərişan sevdamın odlu köksündən,

Yox olan ümidin son naləsindən,

Tək qalan sevdanın qəmli səsindən

Bu dərdli dünyama həmdəm gəlmişdi.

O eşqin günahıdı öldürən məni,

Xəyanət odudu yandıran məni,

Yorğun bir ürəkdi incidən məni

Hicran nəfəsində qəmlə gəlmişdi.

Yazmışdı göylərə qəm fəryadımı,

Almışdı qoynuna ahı-naləmi,

Oxlayıb ruhumda itən eşqimi

Gözlərində bir dərya ahla gəlmişdi.