Məcnunun gözüylə baxdım dünyaya,
Dünya gözlərimdə qəm,kədər dolu.
Çöllü-biyabana saldım güzarı,
Hər tərəf məhəbbət--hədərlə dolu.
****
İstədim Kərəmtək yanım oduna,
Vəfalı Əslimin çatım dadına.
Bir hava çalınsın onun adına,
Adı"Yanıq Kərəm"qəhərlə dolu.
***
Bir xumar baxışlı Xumara meylim
Düşübdür,arada bir səd var,neylim?
Küsüb,inciyibdir məndən gileylim,
İçdiyim badələr zəhərlə dolu.
***
Mövliud,bitirərdim burda fikrimi,
Yazmaqla qurtarmaz mən öz dərdimi,
Eşqinə sadiq ol sən mənim kimi,
Həyat qəza ilə,qədərlə dolu.

12.05.2014.Zərdabi.Mövlud Ağamməd.