Sözünü bilməyən, ey bəşər oğlu,

Baxıram üzünə yazığım gəlir.

Ağzından çıxanı qulağın duymur,

Yarımçıq sözünə yazığım gəlir.

Gözünü tutubdur bir parça kağız,

Böyüyün - kiçiyin bilmirsən yerin.

Bilmirəm nə deyim qarğış olmasın,

Olmusan əsiri bədxahın, şərin.

Şeytan da axtarıb tapıbdır səni,

Bu qədər insanın, varın içindən.

Həyanı, abırı Tanrı verəndə,

Sıyrılıb çıxmısan arın içindən.

Mənim təsəllim var, səbr eyləməkdir,

Allahım səbr edir, mən nə karəyəm?

Sirkənin tündlüyü qabına ziyan,

Zəmanə cəbr edir, mən nə karəyəm.