Müdrükdür kəlməsi,müdrükdür sözü, 
Riyazi terminlə haqlayar düzü. 
Öyrədər sidq ilə şagirdə özü 
Yazmağı hecayla, bax, müəllimə. 

Usanmaz, yorulmaz, səbri bol olar, 
Qiymətin yüksəyi, sonu qol olar. 
Enişi,yoxuşu ayrı yol olar, 
Məğrurdu, ən uca dağ müəllimə. 

Çox izlər,çox sözlər öyrədər bizə, 
Hirslənər bəzən də baxmasan sözə. 
Verməz əsəbini verməz burüzə 
Əqidə, mənlikdə çağ müəllimə. 

İkinci anadır, bəslə məhəbbət   
Vardır kəlməsində daim həqiqət. 
Üzündə təbəssüm,sözdə ədalət, 
Salıbdır çiçəkli bağ Müəllimə. 

Səni vəsf etməyə sözlər də çatmaz, 
Qələm aciz qalar, dili söz tutmaz. 
Seymur müəllimini heç vaxt unutmaz, 
Daim olsun canın sağ,  müəllimə!

 MÜƏLLİF:SEYMUR SÖNMƏZ PAŞAYEV