Yaşlı kişi öz otağından çölə çıxdı. Güzgünün önünə keçib saqqalını və saçını düzəltdi. Hələdə yaraşıqlı olduğunu düşünürdü. Evin önünə çıxıb skamyada oturdu. Birdən sifət ifadəsi dəyişdi. Bir ağırlıq çökdü üzərinə. `` Bu qədər vaxt arzumu yerinə yetirmək üçün heç bir şey etməmişəm və artıq gerçəkləşməsinin mümkün olmadığını bilirəm`` deyə səsli şəkildə düşündü. Birdən skamyanın arxasından cavab gəldi :
- Mümkün olmayan heç bir şey yoxdur.
Yaşlı kişi səs gələn tərəfə baxdı. Cavab verən , qəribə geyimli cavan oğlan idi. Kişi :
- Sən kimsən ? Gənc :
- Heç kim. Sadəcə heç kiməm , amma sənə köməyim toxuna bilər.
- Necə yəni ?
- Sən sadəcə inan. - Dedi gənc və keçib kişinin yanında oturdu. Gənc oğlan `` Əllərimə fikir ver `` dedi və sol əlinin baş və şəhadət barmaqlarını bir- birinə sürtməyə başladı. Barmaqları arasından tüstü çıxdı. `` Bu sənin həyatındır`` dedi `` 2-3 saniyəyə yox oldu gördünmü ? Vaxt tez keçir , bəy`` Yaşlı kişi mat qalmışdı. Çox təəccübləndi gəncə. Ona diqqətlə baxırdı. Gənc arxaya söykəndi , ayaqlarını irəli uzatdı. Gülümsünürdü.
- Arzun nə idi ? – gənc soruşdu
Kişi ayağa qalxaraq sağ əlinin şəhadət barmağı ilə evin arxasından görünən əzəmətli zirvəni göstərdi.
- Ora indiyə kimi heç kim çıxa bilməyib. Yeniyetməlik dövrümdən arzum o dağın zirvəsinə çıxmaq olub. Neçə illərin alpinistləri belə oraya çıxarkən həlak olublar. Mən isə qorxduğum üçün buna cəhd etməmişəm belə. İndisə qorxum keçib , amma , addım atacaq taqətim qalmayıb.
- Narahat olma – dedi gənc. Əllərini bir-birinə sürtdü , sonra isə ovucunda yaranan qəribə rəngli tozu kişinin üzərinə atdı. Toz ətrafa yayıldı. Gözünə girməsin deyə gözlərini yumdu kişi. Göz qapaqlarını yenidən açıdıqda isə , dağın zirvəsində idi.. Sol tərəfində də gənc oğlan. Kişi çox təəccüblü idi , qorxmuşdu və sevinirdi. Gənc oğlana nəsə deyirdi , amma , özü belə nə danışdığını bilmirdi. Dili tutulmuşdu sanki. Gənc isə sadəcə gülümsəməklə kifayətlənirdi.
- Sən mələksən ! Ya da arzuları gerçələşdirən cinsən ! deyə gülərək qışqırdı.
- Xeyr onlar deyiləm – dedi gənc və gülümsündü.
Kişi nəyisə başa düşdü elə bil. Qaşlarını çatdı. Sonra isə qışqıraraq ``düz deyirsən Yadıma düşür !! Anlayıram !! Hər şeyi anlayıram. `` Üzünü oğlandan çevirərək buludlara baxdı.hər şey ayaqlarının altında idi sanki. Mənzərə möhtəşəm idi . Arzusunuda reallaşdırmışdı artıq və bunu özü tək etmişdi. Kişi yadına salmağa başladı hər şeyi : dağa çıxmağı qərar aldığını , buraya çıxa biləcəyinə inandığını və bu yaşında heç kimin bacara bilmədiyini edərək əziyyətlə yuxarı dırmandığını.
Gənc oğlana üzünü çevirdi :
- Hər şeyi anladım – dedi. İnsan hər şeyə qadirdir , sadəcə istəməyi kifayət edər. Sən isə sadəcə mənim cəsarətim , iradəm və istəyim idin ki , bu əziyyətli yolda sənə görə heçnə hiss etmədim və məqsədimə çatdım.
Bu an oğlan gülümsədi və gözdən itdi. Kişi isə , yıxılaraq , üzündə təbəssümlə , rahat şəkildə öldü..