NAXÇIVAN

Yer üzündə bənzərin yox, ey sevimli diyarım,

Sənsən mənim şan-şöhrətim, yenilməyən vüqarım.

Xan Arazın, Arpaçayın çağlayan qan damarım,

Əzəl gündən güvənc yerim, qəlbim-canım Naxçıvan.

Bir səngərdir qarı düşmən qarşısında dağların,

Tükənməyən sərvətindir yaşıl donlu bağların.

Xoş günlərdən soraq verir toy-büsatlı çağların,

Mənim qibləm-qibləgahım, and-amanım Naxçıvan.

Sədərəkdən Culfayacan göz diksə sənə yad,

Anlayır ki, yenilməzdir Şərur, Şahbuz, Ordubad.

“Sirab”ınla “Badamlı”ndan soraq verir Batabat,

Heydər kimi şan-şöhrətli bir dastanım Naxçıvan.

Xoş müjdə ver bu günümdən, sabahımdan yenə sən,

Varlığınla vəcdə gəlsin, fəxr eləsin qoy, Vətən.

Əzəl gündən arzum budur-harda olsam deyim mən,

Sənsən mənim qəlbimdəki öz ünvanım Naxçıvan.

18.06.2018