Sil gözün yaşını, ağlama gəl sən.

Hər şeyi unudub danışıb gülsən,

Bu qara zolaqdan adlaya bilsən,

Göylərdən nur yağar, sevinc tökülər,

Nəhayət sənin də gözlərin gülər.

Özün həm ovçusan, həm də şikarsan.

Özün öz əlindən hara qaçarsan?

Nə yaman ümidsiz, dərdli, naçarsan?

İtirmə inamı, xoş günlər gələr,

Nəhayət sənin də gözlərin gülər.

Qüssəli gözlərin səbəbi yardı.

Bil ki, hər gecənin sabahı vardı.

Qış uzun olsa da, sonu bahardı.

Bir gün dərd-qəmin də beli bükülər,

Nəhayət sənin də gözlərin gülər.