Ələyin ələnib, xəbirin göydə,

Qayıdıb üstümə niyə gəlmisən?

Deyəndə qalmadın, getdin, indisə

Qayıdıb üstümə niyə gəlmisən?

 

Ağzımda nar kimi çatladı dilim,

Nə dedimsə dedin, mən hardan bilim.

Sən mənə nə qədər verdin dərd, zülüm,

Qayıdıb üstümə niyə gəlmisən?

 

Bilirsən atalar deyən söhbəti,

Gözəllik olmayıb, olmaz əbədi.

İndi soruşuram, azmısan, nədir,

Qayıdıb üstümə niyə gəlmisən?

 

Nə olsun olanlar keçib - ötübdür,

Düşünmə yaddaşım düşüb itibdir.

Varlığın qarşımda durub - bitibdir,

Qayıdıb üstümə niyə gəlmisən?

 

Bir əlin olacaq, bir də ki, başın,

Keçmişi çözəcək hələ yaddaşın.

Qalıbmı mənimlə dava - dalaşın,

Qayıdıb üstümə niyə gəlmisən?

 

Nə vaxtdı kamanın ayrılıb oxdan,

Vurduğun yaralar sağalıb çoxdan.

Mən necə yaradım möcüzə yoxdan,

Qayıdıb üstümə niyə gəlmisən?

 

Hardan gəlmisənsə qayıt, get ora,

İnanma salasan sən məni tora.

Qoyma təzə nırxı köhnə bazara,

Qayıdıb üstümə niyə gəlmisən?