Zaman keçir,

Yarışdadır aylar, illər.

Bir-birini qovmaqdadır,

ötən günlər.

Hər nə qədər dönə dövran,

Unudula ötən zaman,

Sənli anı unutmadım.

Mən zamandan

bizə aid hər bir anı oğurladım.

Oğurladım,

saçlarına vaxtsız düşən

hər dənini,

Oğurladım,

gözlərində mirvaritək düyünlənən

göz nəmini.

Oğurladım ürəyindən

kədərini, dərd-qəmini.

İllər keçdi...

Xəyal oldu, xülyalar da

və də sonda,

Keçmişində azıb qalan,

Xəyal içrə çaşıb qalan,

Ürəyindən parçalanan,

Tək mən oldum.

Bütün kədər məni qaldı,

Mənim adım,

Oğruluqla damğalandı.