Danışma dərdini, dərdim oyanır,

Danışma bu həsrət öldürər məni.

Fəryadından yaralarım qanayır,

Danışma bu həsrət öldürər məni.

Söyləmə ayrılıq anını nolar,

Dayanmaz bu ürək, tarımar olar,

Küləyim od olar, bulud ah olar,

Danışma bu həsrət öldürər məni.

Hər gün bir azca darıxacaqsan,

Sonra xəyalıyla uyuyacaqsan,

Tez – tez ürəyinlə dalaşacaqsan,

Danışma bu həsrət öldürər məni.

Özüm baxışıma həsrət qalmışam,

Eşqin oyununa mən də qanmışam,

Alovu özümə vüsal sanmışam,

Danışma bu həsrət öldürər məni.

Ağlama, göz yaşım içimə axır,

Sevdamı taleyim başıma qaxır,

Içimi yandırır, çölümü yaxır,

Danışma bu həsrət öldürər məni.