Mənim kimi fəqir varmı,

Hey tuturlar dilə məni.

Bir imzalıq işim üçün

Dözdürürlər ilə məni.

                               Arxamca bir iz düşəndə,

                               Ünvanıma düz düşəndə,

                               Alovumdan söz düşəndə

                               Bənzədirlər külə məni.

Yoxdu gülləri qoxuyan,

Düz kəlamı,düz oxuyan,

Əlinə əlcək toxuyan

Dolaşdırır milə məni.

                               Boğuldum vəd tüstüsündə,

                               Günahım nə, nə üstündə,

                               Niyə məzarlar üstündə

                               Döndərirlər gülə məni.

Həm şəkər, həm də duzmuşam,

Bəlkə min yuxu yozmuşam,

Neçə şeirimi pozmuşam

Gətirirlər dilə məni.

                               Haqq baxışı istəyirəm,

                               Bəxt naxışı istəyirəm

                               Yaz yağışı istəyirəm

                               Hey atırlar selə məni.

Mübariz dözmə bu hala,

İsrafil surun kaş çala,

Ölməlilər qala-qala

Öldürülər elə məni...