Göstər mənə elə bir nəfs, mənzili ləhəd olmadı
Yaradanın rizasında nə müşkül, nə hədd olmadı

Riyazətdən riyaziyyat doğurmuş ki ali ibrət,
Necə yoxdan var oldu, gör sıfırdan ədəd olmadı?!

Sən əvvəlcə təvəkkül qıl və imanla təfəkkür et
Nədən bunca zikr-i niyaz dərdinə mədəd olmadı?!

Zaman getmiş isə fövtə, ruhusa dönmüşsə məvtə,
Arif olmayan aşüftə bu sirrə bələd olmadı

Yanıb sönmək hikmət deyil ya narından, ya nurundan
Vay halına ol aşiqin, ürəyi məbəd olmadı

Bəs bu halə giriftarkən bükülmüş boynu müznibin
Gərçi onun nəzərində bundan səxt sənəd olmadı

Belə artır qeyl-ü qalım, təki yetsin sona məmnun
Səbrimdən qeyri bir çarə ruhumda sədəd olmadı

Muştuluq ver dəxi Lazım, xoş həvadis vardır yenə;
Nə əvvəlsən, nə də axir, nə də qəm əbəd olmadı