"QANLI ÇÖRƏK"
Vüsalə Vətənxan tərəfindən "Şeir" bolməsinə 17:39 05 aprel 2018 tarixində əlavə olunmuşdur

"Qanlı çörək"

Bir uşaq yeriyir küçə başında, 
Böyük baxışı var uşaq yaşında, 
Həmən baxışlardan dadmayıb gözüm, 
Bir uşaq daşıyır özündə dözüm. 
Yalın ayaqlardan tökülür torpaq, 
Göz yaşı geyinib, özüsə çılpaq, 
Yeriyir, əlində bir parça çörək, 
O qanlı çörəyi yeməsin gərək...

İlahi, bu qədər nə ağır yükdür, 
Uşaqkən çəkdiyi yükü böyükdür. 
Soyuq güllələrdən sağ qalıb deyə, 
Ağlayır, qəlbində dağ qalıb deyə. 
Ana-atasından ayrılıb deyə, 
Düşmənə "qol gücü" çatmayıb deyə...

Ölüm beşiyindən qalxıb, yeriyir, 
Bir "uşaq dünyası" məhv olub gedir. 
Qanlı hekayələr yazır yaddaşa, 
Daş da parçalanar, söyləsən daşa. 
Ağlayır, dodaqda hıçqırıqları, 
Yas tutur içində oyuncaqları. 
Bir ovuc su istər ana əlindən, 
Hey "ana" kəlməsi qopur dilindən. 
Kimsədən istəməz nə bir təsəlli, 
Fəryadlar içində, nədir təsəlli?...

Susdur bu körpəni şirin sözünlə, 
Ağla əvəzinə sən, öz gözünlə. 
İnandır sən xoşbəxt gələcəyinə, 
Gözəl bir dünya ver yetim qəlbinə, 
Bacarsan dərdini al ürəyinə, 
Uşaq ol, sən böyü onun yerinə. 
Uşaq ol, sən böyü onun yerinə...


"Ayaq səsi" hekayə kitabından.
Vüsalə Vətənxan / 2017.


... dəfə oxunub
Qiymət verilməyib...
[qiymət ver ]
Şərh yaz
10+12=
Hesaba giriş
Müəllif

Vüsalə Vətənxan
Haqqında
Gənc şairə, yazıçı. Vüsalə Vətənxan Ağaismayıl qızı - Bakı şəhərində dünyaya göz açmış, Azərbaycanlıdır. 1996-2005-ci illərdə Yeni Günəşlidəki 279 saylı orta məktəbdə, 2005-2008-ci illərdə 2 saylı Bakı Baza tibb kollecində, 2008-2010-cu illərdə Gənclərin 22 saylı Yaradıcılıq evində, 2012-2014-cü illərdə İran İslam Respublikasının Azərbaycandakı Səfirliyinin Mədəniyyət Mərkəzi olan Şəhriyar adına Mədəniyyət evində təhsil almışdır. GİMİD İb.-in tibb üzrə keçirdiyi “Gec qalmayın, gənc qalın.” layihəsində iştirak etmiş və 2014-cü ildə təhsilini müvəffəqiyyətlə başa vurmuşdur. Ədəbi yaradıcılığa 2005-ci illərdən başlamış, ilk uğurunu 2016-cı ildə İİR-nın Azərbaycandakı Səfirliyinin Mədəniyyət Mərkəzi olan Şəhriyar adına Mədəniyyət evində “İmam Rza Mövludu” münasibəti ilə keçirilən tədbirdə almışdır. Foto-Fakt qəzetinin keçirdiyi rəy sorğusunun nəticələrinə əsasən 2016-cı ildə “İstedadlı Gənc Qələm” fəxri mükafatına layiq görülmüşdür. Mərdəkan Mədəniyyət Mərkəzində keçirilən “Bəydəmir Qalalının Yaradıcılıq Gecəsi” adlı proqramındakı iştirakına görə “Ulusəs” və “Yeni şans” qəzetlərinin redaksiya heyətləri tərəfindən “Ədəbi Söz Sahibi” fəxri diplomu ilə mükafatlandırılmışdır. O, həmçinin kimsəsiz uşaqların həyatına həsr etdiyi “Ayaq səsi” hekayəsinə görə “Ulusəs” və “Yeni şans” qəzetlərinin redaksiya heyətləri tərəfindən “Yaradıcı Qələm Sahibi” fəxri mükafatına layiq görülmüşdür. 2018-ci il Azərbaycan Respublikası Mədəniyyət və Turizm Nazirliyinin təşkil etdiyi “Söz” ədəbi layihəsi çərçivəsində keçirilən “Nəsimi – şeir, sənət və mənəviyyat” festivalının diplomla təltif edilmiş qalibidir. “Dirili Qurbani”, “Vahid” poeziya - ədəbi məclislərinin üzvü olmuş, hal-hazırda “Məcməüş-şüəra” və Azərbaycan Yazıçılar Birliyinin Xəzər Bölməsinin üzvüdür. “Bir ovuc kölgə…” adlı şeirlər toplusu (2015) və “Ayaq səsi” adlı hekayə (2017) kitablarının müəllifidir.
Əlaqə
Tel.:
070-508-62-**
E-mail:
vusale.vetenxan@mail.ru
Sosial şəbəkə:
Facebook
YouTube-da izlə
Facebook
0.039 saniye