Rəbbi qılsaydım aşina, nəfsimdə dad gözləməzdim,

Damu alovundan özgə, qeyri imdad gözləməzdim

Nə halətmiş, kölgələnmiş öz narında nəfsim mənim

Atəş sarmış ürəyimdən bunca fəryad gözləməzdim

Əzəldən tərs güzarımla bu dövranın addımları

Çün, dövranın mənsəbindən şöhrət, nə ad gözləməzdim

Gər olsaydım öz nəfsimin hüzurunda müti, fəqir,

Dünya mülkün yan eyləyib könlü abad gözləməzdim

Hər kim Haqqdan ayrı düşüb bir adəmə saldı mehrin,

Ol bəndənin imanında böylə fəsad gözləməzdim

Qılınmışsaq varlıqların ərşi-əladan əşrəfi,

Hər nə varsam, qane olub quşdan qanad gözləməzdim

Mən Lazımın istirhamı huri mələk, uçmaq deyil

Olmasaydı tanrı eşqi, məhşər, məad gözləməzdim