Sanki olmamısan mənim üçün sən,
Səni sevməyim də əfsanə imiş.
Sevgi yollarında bir-birimizdən
Bəs bizi ayıran söylə,nə imiş?

Nakam eşqimizdən doya bilmədik,
Aldı əlimizdən amansız fələk.
Üzü baharadır,yaya,bilmədik,
Günahdır qışa da vəfasız demək.

Əsdi qara yellər sevgi bağına,
Məhəbbət yolunu kəsdi qar,boran.
Vəfalı olsaydın əhdi-peymana,
Səni itirməzdim heç vaxt,heç zaman.

Sanki gəlməmisən bu dünyaya sən,
Səni sevməyim də bir yuxu imiş.
Bizi ayıran da bir-birimizdən
Sevgi hislərinin yoxluğu imiş.

31.01.1982 / Sumqayıt
Mövlud Ağamməd