Kimisinə tərif,kimə qınağam,

Ömür adlı yolda çətin sınağam.

Bu dünyada beş-on günlük qonağam,

Sən qəlbimə köçmüş ev sahibisən.

Durnalar tək qatar qatar ötür il,

Gah endirir,gah qaldırır dinən dil.

Birdəfilik yaddaşına gətir, bil-

Sən qəlbimə köçmüş ev sahibisən.

Unutmaqmı? Çətin! Belə düşünmə.

Ayrılaqmı? Heç ağlına gətirmə!

Bu sevdanı, məhəbbəti bitirmə-

Sən qəlbimə köçmüş ev sahibisən.

Tanış gələr rast gələndə bax, izim,

Unudulmaz xatirəmiz var bizim.

Söyləyirəm pıçıltıyla, əzizim -

Sən qəlbimə köçmüş ev sahibisən .

MÜƏLLİF:SEYMUR SÖNMƏZ PAŞAYEV

01.03.2018