İnsanlar var ki, səssizlikləri ilə danışarlar. Aqil şəxsiyyətlər üçün onları dinləmək, anlamaq, duymaq çox da çətin olmaz. Dünyanın bu, ağır və həyacanlı   zamanında səssizlik, qarmaqarışıq səslər içində daha aydın, daha   səlis duyulur.

Qocalar evinə atılan ağbirçək ananın qapiya dikilən baxışlarındakı dərin hüzün   çox şeyləri anladar səssizliyində. Nankor övladının gəlişinə  ümid edər, ağ saçlı ana, ağsaqqal ata. Gələcəklərinə inanmasa belə, qəlbində  bir təsəlli   işığı alovlandırar. Bu, ixtiyarların  danışmasına  ehtiyac qalmaz. Səssizlikləri çox mətləblərdən  agah edər, aqil olan insanları. Anasını tərk etmış atasını  axtarar baxışları ilə, bəzi fidanlar. Danışmasalar da, məsum gözlərinin dərinlikləri çox şeylər söylər. Onların səssizliyinə qulaq versən,   səslərinin sehrinə düşərsən. Onlar üçün bu, dünyada ata və ana qədər şirin heç nə yoxdur. Atalarını hamıdan güclü bilər, ancaq, atasızlıq onları çox incidər. Səssizliyi ilə danışar, onu tərk edən atası ilə. Qəlbində bir ümid alovu yandırar. Atasının bir gün geri dönəcəyini, onu bağrına basacağını xəyal edər. Bir boynu yoğun, gönü qalın məmurun zülmünə düçar olan fağırın susqun, çarəsiz çöhrəsinə nəzər sal. Məzlum   baxışların dərinliyində  Rəbbinə giley – güzarı var. Həyasız məmurun qalın, xırıltılı, anlaşılmaz səsi qarşısında həyasına qısılıb səssizliyi ilə   danışır. Dinlə, diqqətlə qulaq as, gör necə can yandıran sözlər deyir, necə fəğan edir. Həyatını tənhalıqla bağlayan, cansız kitablarla daha yaxşı anlaşan, küçələrdə ömür – gün keçirən dünənin alimi, bu günün qəmgini. Bir ona da, diqqət yetir, nəzər sal. Oxuduqlarını içindəki səssizliyi ilə paylaşır. Ayaqlarının yanına uzanmış köpək dostlarından daha sadiq, daha etibarlıdır. Sahibinin elm adamı olmasından sanki iftixar hissi duyur. Sahibi ilə səssizliklərinin səsi ilə çox gözəl anlaşırlar.

Qarğa bazarında susub başlarını çiyinlərinə sıxmış  bülbüllərin səsini eşidirsənmi? Səssizlikləri belə, onların gözəlliklərinə kölgə salmır. Səssizlərin səsinə qulaq ver, onların səslərində bir mənalı aləm var. Zatən qarışıq olan, qışqırıq   basan   dünyada, sənə ən çox xoş gələn elə, səssizliyin səsi olacaq...