Qarşıma çıxırsan yenə hər səhər,
Hər günüm beləcə keçir,sevgilim.
Nədəndir,baxırsan mənə birtəhər,
Baxışın nə məna verir,sevgilim?

Kədər də mənimdir,qəm də mənimdir,
Duman da mənimdir,çən də mənimdir.
O güllü gülüstan öz çəmənimdir,
O gülə sən məni yetir,sevgilim.

Mövludam, ömrümə doldu qəm,həsrət,
Eşqin cəfasını çəkmisən,əlbət.
Bir dünyam səninlə qalıb-məhəbbət,
Qaytar o dünyamı gətir,sevgilim

5.12.1979 / Axalkalaki
Mövlud Ağamməd