ŞƏHİDİM

Bilirdin qəsdinə durubdu yağı,
Bəs, niyə qaradan seçmədin ağı?
Sənin ölən vaxtın deyildi axı,
Bizi məyus etdin nədən, şəhidim!

Ürəyim şan-şandı, gözlərim dolub,
Qəm-qüssə qəlbimdə yenə iz salıb.
Ölümü gözünün altına alıb,
Torpağı yurd-vətən edən şəhidim!

Heyif ki tez çatdı sona həyatın,
Bir ana naləsi ağın-bayatın...
Elin sevgisidir son mükafatın,
Nə ad-san, nə şöhrət güdən, şəhidim!

Əgər haqq yolunda qəhr olubsa can,
Heç vaxt yerdə qalmır nə qisas, nə qan...
Çiçəyi burnunda getdin dünyadan,
Hələ çatmasa da vədən, şəhidim!

Qaldın yaddaşlarda şərəf-şan kimi,
Hamıya doğmasan ürək-can kimi.
Bir zəfər müjdəli qəhrəman kimi,
Tanrı dərgahına gedən şəhidim!

14.09.2022
SEYMUR SÖNMƏZ PAŞAYEV