Üzülməyə səbəbim yox,
Kədərim az, sevincim çox,
“Ac sevgimin” qarnı da tox,
Şeir yazmaq istəyirəm.

Sındırıb bu qəm tarımı,
Əridib həsrət qarımı,
Boşayaraq “dərd” yarımı,
Şeir yazmaq istəyirəm.

Yazım qəlbimə başqa ad,
Xəyallarım açsın qanad,
Onsuz gecələrə inad,
Şeir yazmaq istəyirəm.

Yığıb yollardan gözümü,
Unudum hərdən özümü,
Tapıb canımda dözümü,
Şeir yazmaq istəyirəm.