Təklik, insanı

başını qoyub yatdığı balıncı

öpməyə məcbur edir...

***

hər axşamın,

hər gecənin

zülmət qaranlığında

titrəyə-titrəyə

çarpayıda

yorğana bərk-bərk bürünüb

isinmək çətin olur...

***

soyuq otaq,

soyuq divar,

soyuq tavan

bir də soyuq döşəmə var...

tək adamın tək mənzildə faciəli həyatı var...

***

buz bağlamış ayağın

şaxtadan donmuş qulağın

əziyyətini gözlər çəkir...

qış fəslində soyuq vaxtı

buxarlanmış pəncərəyə

iki əlin on barmağı

ümidsizlik rəsmi çəkir...

***

neçə gündür

yataqdakı tənha bədən

isti çaya həsrət qalıb...

udqunmağa quru boğaz

suluqlamış dodaq qalıb...

göz yaşı da quruyubdur

şişman, ətli yanaqlarda

inan

kişilərin taleyidir

sonda

yetim qalmaq

qadınlarsız yataqlarda...