TAX BOYNUMA
***
tax boynuma dodaqlarını ,
asılım öpüşlərindən.
qalım havada ayağım yerdən üzülsün.

tax boynuma əllərini,
barmaqların həzin bir piano kimi, 
nəğmələr gətirsin , susqun bədənə,
ruhuma sevgilər süzülsün.

tax gözlərini boynuma,
çiynimə toxunsun kipriklərin.
bir az gileylən,
bir az kədərlən,
ağla içim göz yaşını.

tax boynuma qəmini-qüssələrini,
tək-tənha keçən gecələrini,səhərlərini.

qoy əritsin bədənindəki günəş,
damarımda buz tutan çayları,
aşıb –daşıb dağıtmaq istəyirəm.

tax boynuma bu şəhəri,
parçalanıb sənsiz küçələrə.
yollar qaçır ayaqlarımdan,
onları tutub özümdə saxlamaq istəyirəm.

tax özünü boynuma,
səninlə nəfəs almaq istəyirəm.