Uçan balıqlar
Mirzə Lazım tərəfindən "Şeir" bolməsinə 20:42 09 iyul 2019 tarixində əlavə olunmuşdur

Bilməzdim belə gözəl susa bilirsən...

Mat qalmışam özüm də

səndə görə bilmədiyim ənginliklərə...

Dəniz dalğa-dalğa sahilə atsa da hər şeyi,

sən tamam fərqli idin,

məni içinə çəkirdin – dərinliklərə...

Sənə doğru durmadan irəlilədikcə

narahat da olurdun boğulmağımdan...

Məni günahlandırıb çox da qınama,

axı ömrümdə hələ

tərsinə dalğalanan dəniz görməmişdim heç...

 

* * *

 

Çox da çılğın deyiləm bu aralar nədənsə,

hətta bunun əksinə,

gərginəm, əzginəm və köhnə bir xəbər - tənhayam...

Altı əsrdir təşəkkül tapa bilməyən

əlli milyonluq xalqın içində tənhayam, əzizim...

Bu mənim təsəlli tapa bildiyim saydır hələ...

Bir də bunun üstünə yeddi milyard gələndə

dəhşət bürüyür məni,

təngnəfəs oluram,

gözlərim qaralır, ruhum daralır,

Bakının tüstü-qoxusunda mazutla məst oluram

Bir az hava tapa bilsəm, ciyərlərimə çəkəcəyəm

Axı xəbərin yoxdur,

siqareti tərgidəndən

oksigenə qurşanmışam...

 

* * *

 

Bilirdim ki,

Boşuna deyil mənim kütləyə olan nifrətim,

aramıza girməyə də üz tapıb indi...

Özün bir bax,

əlimdən almırmı mənə səni andıran və ruhumu dindirən hər şeyi?!

Əvvəl o sevimli və səssiz gölün simasını dəyişdilər,

İndisə səni düşünüb xəyallara daldığım

o xudmani kafenin yerində

geyim dükanı açıblar...

Nə qədər bərbad olsa da, geriyə bir yaddaşım qalıb...

Halbuki, bir zamanlar

yaddaşımı itirmək ən böyük arzum idi...

Əlimdən almısan sən o arzunu da,

Necə yaddaşımdan vaz keçim axı?!

Sənlə bağlı xatirələr də ordadırsa?!

 

* * *

 

Bütün bunlara rəğmən bədbinəmmi?

Qətiyyən...

Axı əllərim var mənim sənə uzanan,

Xoşbəxtliksə barmaqlarımın ucundadır

-  ən sadə duyğulardan

ruhumun zərrələri sənə doğru qaça bilirlər

Heç ağlına da gəlməz, inanmazsan;

elə sevincliyəm, elə xoşbəxtəm ki...

Öyrəndiyim o gündən ki,

balıqlar da...

Hətta balıqlar da uça bilirlər...


... dəfə oxunub
Qiymət: 10/10(2 səs)
[qiymət ver ]
Şərh yaz
5+32=
Hesaba giriş
YouTube-da izlə
Facebook
0.0218 saniye