Uyaraq dövrana sən daima şimşək kimi ol.
Hər kəsə lazım olan yağlı bir əppək kimi ol.

Elə rəftar elə yandırmayasan şiş-kababı,
Tük sayaq çıx yağ içindən hər an mələk kimi ol.

Qulağı kar, gözü kor et, ətrafa salma nəzər,
Kim nə deyirsə, desin, sən yabı eşşək kimi ol.

Hər kimin var sənə xeyiri, dəyəri də ona ver,
Xeyiri olmayan hər bir kəsə köpək kimi ol.

Bu cəmiyyət sevir hər an ağlayan, sızlayanı,
Sən də unutma bunu, hər zaman kövrək kimi ol.

Halalı qat harama, pul-para topla, həcə get,
Hər kim olsan da sonunda Həci Leylək kimi ol.

Sən də, Cinan, düzə düz, əyriyə də əyri de ki,
Bəsirətin gözütək daima örnək kimi ol.